Learning tae drive on an island is easier than learning tae drive in a city. No roondaboots. No traffic lights. No dual carriageway. Ye might hiv tae watch oot for ducks crossing. Or owld fermers oot for a slow drive, lukkan at the kye. But there’s no doot, it’s easier tae learn tae drive on an island.
Ye come tae understand that ye’ll probably recognise just aboot everybody ye meet on the road. When ye’re gettan lessons, ye mak a peedie, surreptitious glance at the driver o every vehicle ye pass (hoping your driving instructor doesna notice). When you pass your test, you are free tae gie them aal a freendly wave when ye meet; it’s fun when ye see yer pals.
Folk hiv got their own, idiosyncratic waves that they use when drivan. Wan freend acknowledges ye wae an almost imperceptible lift o the finger. Anither flaps his airm up so high he hits the roof o the ker.
So it saddens me that there’s a lot o folk livan here noo who hiv no idea aboot island road etiquette whitsoever.
An owld freend o mine, who is in his 80s, wis accosted in November by a fast driver who nearly ran intae him in a 30 MPH zone. The driver pulled in ahead o him, and accused me freend o pullan oot in front o him. When me freend pointed oot that is wis a 30 zone, the ither driver became aggressive. Anither freend haed the misfortune tae go off the road on the ice in December, ending up in a field. A passing driver stopped, not tae ask if he wis OK, but tae shout ‘idiot’ at him. Giving a teenager a lesson in Kirkwall last week, I couldna believe it when a ker behint impatiently peeped the horn at her.
Whit folk like these fail tae appreciate is that this island only has a limited number of folk, and a limited number o roads. Ye’ll go roond and roond, and meet the sam folk ower and ower again. It’s worth mindan on that the sam applies tae island life in general. That’s why we tend tae be polite folk, who avoid confrontation if we can help it. 21st century road-rage doesna work in wae island living.