Sorry, but the picture o the lambs is cheust clickbait. This post is aboot sometheen else. It’s aboot pittan up a new lambeen shed. Read on, though! Pittan up a new shed is a big event.
Ally arrived shortly eftir Christmas wae his Japanese digger tae dig oot the found. He worked long oors, and soon struck rock; the kind o stuff we caal ‘blue whin’, tae be precise. Haird as diamond. Whit ancient sediment wis he brakkan up? Whittiver it wis, stoor stood oot o it when Ally pit the brakkar on it. That slowed us doon a bit. We enjoyed Ally’s company when he wis here. But when he wis feeneeshed, we didna miss the noise o the brakkar gaan aal weekend long. D D. Ddd ddd ddd ddd ddd ddd ddd ddd ddd ddd ddd. Ddd ddd. D d. d.
Eftir the hole wis dug, Bruce and Scott arrived tae assemble the kit. It gaed up in no time. These boys work haird, teu. And in any weather. Drivan rain, howlan wind, freezan cowld. Nane o it bothered them much – they cheust worked and worked and worked. And the shed wis up – a bonny new structure gleaman in the April sunshine. They got the concrete floor poored in the nick o time.
So. Tak the sheep in, and stert lamban. The usual, cutesy ‘Lambing Diary’ stuff sterts tae happen. Multiple births. Easy lambeens. Bad lambeens. Up aal night. Unsuccessful adoptions. Successful adoptions. Orf. Snatchan some sleep through the day when ye can. Calorific breakfasts, and litres o cappuccino. Faalan asleep on a weet bale in the new shed at 4.45 am. Steam in the haet o the piggy bulbs. Milk. Mithers. Atrocious waather. Joni Mitchell on the radio. Boiler suits laggered in … best no tae say. Red Throated Divers caalan ootside. Peedie lambs gaan Meeeh! Meeeh! Meeeh! till yur cheust aboot demented wae it.
Soon, the new shed, that began as an empty hole in the grunnd, is fill o life.
I step ootsite the shed door wan morneen at aboot 6.00. The sun is shinan eftir a few days o April shooers. The rain haes washed the gutter fae the thoosand fragments o blue whin that lie aal roond the site. In the corner o me eye, I see the fossilised underjaw o a peedie fish – no unlike a troot fae the Harray Loch. If thur’s new life in the new shed, then thur’s the remains o some o the owldest life on Earth rooed up ootside. Fossil fish fae the sediment o Devonian Loch Orcadie, when Orkney wis in the southern hemisphere.